سياسة الخصوصية
باختصار: بنجمع إيه، وليه، ومين يشوفه.
بنجمع إيه؟
- اسمك الأول ورقم موبايلك.
- رقم موبايل ولي أمرك.
- الصف (من رابعة ابتدائي لتالتة ثانوي) والمدرسة والمحافظة.
- الاسم المستعار اللي بتختاره.
- سجل المشاهدة: الدروس اللي اتفرجت عليها ووقفت فين.
- سجل الاختبارات: إجاباتك ودرجاتك ونقطك.
- لو فعّلت الإشعارات: عنوان الإشعارات ومفاتيحها لكل متصفح فعّلتها عليه، ونص الإشعارات اللي بعتناها لك آخر 30 يوم (لولي الأمر فيها الاسم الأول لكل ابن ووقت مذاكرته في الأسبوع).
وبنستخدم OnLooq عشان نعرف عدد الزيارات والصفحات اللي الناس بتفتحها. بياخد عنوان الصفحة من غير أي بيانات بعد علامة الاستفهام، والموقع اللي جيت منه، ونوع الجهاز والمتصفح، ورقم عشوائي بيتحفظ في المتصفح. مش بياخد اسمك ولا رقمك ولا الـ IP بتاعك ومش بيستخدم cookies، ومش شغال في صفحات الأدمن والشركاء وأولياء الأمور ولا جوه الاختبار.
ليه؟
- عشان تدخل حسابك، ونفتحلك دروس صفك حسب اشتراكك.
- عشان نحفظ تقدمك وتشوفه في صفحتك.
- عشان نعمل ترتيب الأسبوع بين طلبة كل صف ومدارسهم.
- عشان نرد عليك لما تكلمنا.
- رقم ولي الأمر عشان نكلمه عن الحساب والاشتراك بس.
مين يشوف إيه؟
- الناس تشوف الاسم المستعار بس، ونقطك وترتيبك.
- اسمك ورقمك ورقم ولي أمرك ومدرستك ومحافظتك يشوفهم فريق تك بالمصري بس، للدعم والاشتراكات.
- رقم ولي الأمر مش بيظهر لحد تاني خالص، ولا حتى للمدرسين والشركاء.
- ولي الأمر اللي إنت ربطته بحسابك يشوف مذاكرتك (تحت).
- الإشعارات بتعدي متشفّرة على خدمة الإشعارات بتاعة المتصفح (جوجل أو أبل أو موزيلا أو مايكروسوفت) عشان توصل لجهازك. تقفلها في أي وقت من «الإشعارات» في صفحتك («اقفلها على الجهاز ده»)، أو بالخروج من الحساب، أو من إعدادات المتصفح.
ولي الأمر
الحساب لطالب. عشان كده لازم ولي الأمر يوافق على الشروط والسياسة دي قبل ما الحساب يتعمل، وبنطلب رقم موبايله عشان نقدر نكلمه عن الحساب والاشتراك.
حساب ولي الأمر يشوف إيه؟
ولي الأمر يعمل حساب لنفسه (رقم موبايله واسمه الأول وكلمة سر). الربط بيحصل بس لما إنت تعمل كود من صفحتك وتبعتهوله: مش بنربط حد عشان رقمه شبه رقم ولي الأمر اللي كتبته. الكود لمرة واحدة، وبيخلص بعد 7 أيام، وتقدر تربط اتنين بالكتير.
- بيشوف: اسمك الأول وصفك واسمك المستعار، والدروس اللي اتفرجت عليها وقد إيه منها، ودرجات الاختبارات (أحسن درجة وآخر درجة وتاريخها وساعتها)، وإجاباتك في كل اختبار: صح ولا غلط، والإجابة الصح والشرح، ونقطك ولفلك وسلسلتك وترتيبك في الأسبوع، ووقت مذاكرتك في الأسبوع وكله، وآخر مرة ذاكرت، واشتراكك ولحد إمتى.
- مش بيشوف: رقم موبايلك ولا كلمة السر.
- إنت بتشوف الاسم الأول بس لولي الأمر المربوط، وتقدر تفك الربط من صفحتك في أي وقت.
تكلمنا إزاي؟
عايز تسأل، أو تعدّل بياناتك، أو تمسح حسابك؟ كلمنا على واتساب الدعم.